ម៉ាស៊ីនគិតលេខបែបគូរក្រាហ្វមានសមត្ថភាពបំប្លែងរូបមន្តជាតម្លៃលេខ រួចហើយបង្ហាញជាទម្រង់ក្រាហ្វ។ ដោយហេតុផលនេះហើយ ទើបម៉ាស៊ីនគិតលេខបែបក្រាហ្វទាំងនេះត្រូវបានប្រើប្រាស់យ៉ាងទូលំទូលាយនៅទូទាំងពិភពលោក សម្រាប់ជាឧបករណ៍ជំនួយការអប់រំដ៏ល្អឥតខ្ចោះក្នុងការពង្រឹងការសិក្សារបស់សិស្ស និងជំនួយការយល់ដឹងឱ្យកាន់តែស៊ីជម្រៅ។
ថ្វីបើបច្ចុប្បន្ននេះ សមត្ថភាពគូរក្រាហ្វបែបនេះត្រូវបានចាត់ទុកថាជារឿងសាមញ្ញក៏ដោយ ប៉ុន្តែកាលពីអតីតកាល នៅពេលដែលម៉ាស៊ីនគិតលេខទាំងនេះមិនទាន់មានវត្តមាននៅទូទាំងពិភពលោក ការព្យាយាមធ្វើឱ្យមានការទទួលស្គាល់ម៉ាស៊ីនគិតលេខនេះនៅគ្រប់ទីកន្លែងគឺជារឿងដ៏ពិបាកខ្លាំង។
Casio បានផលិត និងដាក់លក់ម៉ាស៊ីនគិតលេខបែបគូរក្រាហ្វ fx-7000G ដំបូងគេបង្អស់របស់ពិភពលោក។ នៅទីនេះ យើងនឹងស្វែងយល់ពីរឿងរ៉ាវនៅពីក្រោយការអភិវឌ្ឈផលិតផលប្រកបដោយភាពច្នៃប្រឌិតនេះ និងអ្វីៗដែលគេត្រូវការដើម្បីធ្វើឱ្យម៉ាស៊ីនគិតលេខមួយនេះក្លាយជាការពិត។
Hiroyuki Yoshino អ្នកអភិវឌ្ឍន៍ fx-7000G
Yoshino បានចូលរួមជាមួយ Casio ក្នុងឆ្នាំ 1979។ អស់រយៈពេល 41 ឆ្នាំមកហើយ គាត់បានធ្វើការលើការអភិវឌ្ឍម៉ាស៊ីនគិតលេខបែបវិទ្យាសាស្រ្ត និងសកម្មភាពជំនួយដល់ការអប់រំជាច្រើន។
ដំណើរកកើតឡើងនៃម៉ាស៊ីនគិតលេខបែបវិទ្យាសាស្ត្រ៖ fx-1 បានចាប់កំណើតឡើង
តើម៉ាស៊ីនគិតលេខបែបវិទ្យាសាស្ត្រនេះកើតឡើងយ៉ាងដូចម្ដេច? ម៉ាស៊ីនគិតលេខគឺជាលទ្ធផលនៃការរួមបញ្ចូលគ្នារវាងបច្ចេកវិទ្យា និងក្ដីប្រាថ្នាជួយសម្រាលអ្នកប្រើប្រាស់ពីការគណនាលេខ។ ប្រសិនបើមនុស្សមិនចាំបាច់ធ្វើការគណនាច្រើនដោយខ្លួនឯងទេ នោះពួកគេអាចផ្តោតលើការគិតដែលកាន់តែមានលក្ខណៈស្មុគស្មាញជាងនេះ។ កិច្ចខិតខំប្រឹងប្រែងសម្រេចគោលដៅនេះនៅ Casio បានចាប់ផ្ដើមនៅឆ្នាំ 1972 នៅពេលដែលក្រុមហ៊ុនបានចេញផ្សាយម៉ាស៊ីនគិតលេខបែបវិទ្យាសាស្រ្តដំបូងគេពីប្រទេសជប៉ុនគឺ fx-1 ទៅកាន់ពិភពលោក។ ផលិតផលនេះទទួលបានការគាំទ្រយ៉ាងខ្លាំងពីបុគ្គលិកបច្ចេកទេស និងសិស្សនិស្សិត។ ឥឡូវនេះ ក្រុមមនុស្សទាំងនេះអាចប្រើម៉ាស៊ីនគិតលេខ ដើម្បីដំណើរការរូបមន្តកម្រិតខ្ពស់ដែលកាលពីមុនពួកគេត្រូវគណនាដោយដៃ។ fx-1 គឺជាការចាប់ផ្ដើមនៃការវិវត្តបន្ថែមទៀតសម្រាប់ម៉ាស៊ីនគិតលេខបែបវិទ្យាសាស្រ្ត រួមទាំង fx-7000G ផងដែរ។
ការបង្ហាញពីរូបមន្ត និងទិន្នន័យតារាង៖ ការសិក្សាភាពច្នៃប្រឌិតពីម៉ាស៊ីនគិតលេខ fx-7000G
នៅឆ្នាំ 1985 ក្រុមហ៊ុន Casio បានចេញផ្សាយម៉ាស៊ីនគិតលេខបែបវិទ្យាសាស្ត្រដំបូងគេរបស់ពិភពលោកដែលមានមុខងារគូរក្រាហ្វគឺ fx-7000G។ កាលពីមុន ម៉ាស៊ីនគិតលេខបែបវិទ្យាសាស្ត្រផ្ដល់ចម្លើយក្នុងទម្រង់ជាតម្លៃលេខប៉ុណ្ណោះ។ ប៉ុន្តែម៉ាស៊ីនគិតលេខ fx-7000G មានសមត្ថភាពបង្ហាញមុខងារជាក្រាហ្វបន្ទាត់ ទិន្នន័យតារាងជាក្រាហ្វសសរ និងអ្វីៗជាច្រើនទៀត។ ម៉ាស៊ីនគិតលេខនេះអាចប្រើរូបភាព ដើម្បីបង្ហាញពីគោលគំនិតនានាដែលយើងពិបាកយល់ដោយគ្រាន់តែមើលតម្លៃលេខ។ ម៉ាស៊ីនគិតលេខ fx-7000G ត្រូវបានគេសរសើរថាជាផលិតផលប្រកបដោយភាពច្នៃប្រឌិតដែលបានជួយដល់ការសិក្សា ដែលនេះជាការវិវត្តដ៏ពិតប្រាកដនៃម៉ាស៊ីនគិតលេខ។
អ្វីគ្រប់យ៉ាងបានផ្ដើមចេញពីសំណើ មួយទំព័រ
តើម៉ាស៊ីនគិតលេខបែបគូរក្រាហ្វ fx-7000G បានចាប់ផ្ដើមដោយរបៀបណា? លោក Hiroyuki Yoshino ដែលជាអ្នកអភិវឌ្ឍន៍ម្នាក់នៅក្នុងគម្រោងនេះ បានក្រឡេកមើលកាលសម័យនោះ រួចនឹកឃើញថា “គម្រោងនេះបានចាប់ផ្ដើមពីទំព័រសៀវភៅសិក្សាគណិតវិទ្យា។”
“ចាប់ពីឆ្នាំ 1980 មក ម៉ាស៊ីនគិតលេខបែបវិទ្យាសាស្ត្រមិនមែនត្រូវបានប្រើដោយវិស្វករតែប៉ុណ្ណោះទេ។ សិស្សវិទ្យាល័យ និងនិស្សិតសាកលវិទ្យាល័យក៏ចាប់ផ្ដើមប្រើវាដែរ។ ដូច្នេះ យើងចោទសួរខ្លួនឯងថា តើម៉ាស៊ីនគិតលេខបែបវិទ្យាសាស្ត្រប្រភេទណាដែលមានប្រយោជន៍សម្រាប់ការសិក្សាគណិតវិទ្យា? បន្ទាប់មក យើងបានប្រមូល និងពិនិត្យមើលសៀវភៅសិក្សាគណិតវិទ្យាពីជុំវិញពិភពលោក។ យើងបានទទួលស្គាល់ថា នៅសម័យនោះម៉ាស៊ីនគិតលេខបែបវិទ្យាសាស្ត្រមិនអាចបង្ហាញក្រាហ្វដែលមានសារៈសំខាន់សម្រាប់គណិតវិទ្យាបានទេ។ យើងគិតថា យើងអាចធ្វើឱ្យការអប់រំផ្នែកគណិតវិទ្យាប្រសើរឡើងតាមរយៈការស្វែងយល់ពីរបៀបបង្កើតរូបភាពក្រាហ្វ។”
Yoshino បានសម្រេចចិត្តរកមធ្យោបាយបង្កើតម៉ាស៊ីនគិតលេខបែបវិទ្យាសាស្ត្រដែលអាចបង្កើតក្រាហ្វបាន ហើយបានកត់ទុកភ្លាមៗនូវគំនិតរបស់គាត់នៅក្នុងសំណើមួយទំព័រនៅឆ្នាំ 1983។ សំណើនេះបានពណ៌នាអំពីការគូរ ក្រាហ្វសម្រាប់ y=x2 នៅលើអេក្រង់ម៉ាស៊ីនគិតលេខ។ នៅពេលគាត់បានបង្ហាញសំណើនេះ គម្រោងទទួលបានការយល់ព្រមភ្លាមៗ។ ហើយអ្នកអភិវឌ្ឍន៍ក៏បានចាប់ផ្ដើមស្នាដៃរបស់ពួកគាត់ភ្លាមៗនោះដែរ។
“មិនទាន់មាននរណាម្នាក់ធ្វើអ្វីបែបនេះនៅឡើយទេ។ យើងមិនដឹងថាតើយើងនឹងត្រូវធ្វើអ្វី ដើម្បីឱ្យម៉ាស៊ីនគិតលេខនេះដំណើរការបានទេ។ ប៉ុន្តែយើងមានអារម្មណ៍រំភើប ដោយសារយើងនឹងប្រើដៃរបស់យើងផ្ទាល់ ដើម្បីបង្កើតអ្វីមួយដែលពិភពលោកមិនធ្លាប់ឃើញពីមុន។”
ដំណើរការអភិវឌ្ឍនៃការសាកល្បង និងបញ្ហាឥតឈប់ឈរ
កិច្ចខិតខំប្រឹងប្រែងបង្កើតផលិតផលថ្មីស្រឡាងមួយពីចំណុចសូន្យបានចាប់ផ្ដើមដោយបែបនេះ។
“យើងបានប្ដេជ្ញាចិត្តបង្កើតអ្វីមួយដែលមនុស្សជាតិនឹងសប្បាយចិត្ត នៅពេលដែលយើងបង្ហាញវាទៅកាន់ពិភពលោក។ យើងដឹងថា យើងត្រូវបង្ហាញអ្នកប្រើប្រាស់របស់យើងនូវអ្វីមួយដែលធ្វើឱ្យពួកគេនឹងភ្ញាក់ផ្អើល។ នោះហើយជាមោទនភាពដែលយើងមានក្នុងនាមជាអ្នកអភិវឌ្ឍន៍។”
ក្រុមការងារយើងបានជួបឧបសគ្គធំមួយក្នុងការព្យាយាមបង្ហាញក្រាហ្វ។ វិធីសាស្រ្តធម្មតាមិនអាចគូរក្រាហ្វដោយប្រើខ្សែកោងបានទេ។
“យើងដឹងថា យើងត្រូវប្រើការបង្ហាញចំណុចពេញ ដើម្បីគូរក្រាហ្វឱ្យបានត្រឹមត្រូវ ប៉ុន្តែវានឹងបង្កើនការប្រើប្រាស់ថាមពលបន្ថែមទៀត។ យើងក៏ចង់ឱ្យម៉ាស៊ីនគិតលេខដំណើរការដោយប្រើថ្មផងដែរ ដើម្បីឱ្យអ្នកប្រើប្រាស់អាចយកវាតាមខ្លួនបាន។ ដើម្បីប្រាកដថាម៉ាស៊ីនគិតលេខអាចយកតាមខ្លួនបាន យើងបានប្រើ LCD ម៉ាទ្រីសចំណុច និងរចនាម៉ាស៊ីនគិតលេខឱ្យប្រើប្រាស់ថាមពលតិច។ យើងក៏បានគិតអំពីរបៀបធ្វើឱ្យម៉ាស៊ីនគិតលេខមានទំហំតូចងាយស្រួលកាន់ និងរបៀបធ្វើឱ្យអេក្រង់ងាយស្រួលអានផងដែរ។”
អ្នកអភិវឌ្ឍន៍សម្រេចបានសមត្ថភាពគូរក្រាហ្វ ទោះបីជាមានឧបសគ្គរាំងស្ទះផ្សេងៗក៏ដោយ ដោយសារតែភាពប៉ិនប្រសប់ និងការតស៊ូរបស់ពួកគេ។
ចំពោះសូហ្វវែរផងដែរ វិធីដែលម៉ាស៊ីនគិតលេខនឹងគូរក្រាហ្វជាបញ្ហាមួយផ្សេងទៀត។
“នៅពេលយើងមើលសៀវភៅមេរៀនគណិតវិទ្យា ហើយពិចារណាលើមុខងារដែលយើងត្រូវការ យើងបានគិតអំពីរបៀបដែលយើងនឹងគូរក្រាហ្វ និងបង្ហាញកូអ័រដោណេរបស់ក្រាហ្វ ហើយផ្ដល់មុខងារជាមូលដ្ឋានដូចជាការពង្រីក និងបង្រួម។ ខ្ញុំគិតថាវាគឺជាពេលដែលយើងចាប់ផ្ដើមគិតអំពីការដែលមានអ្វីៗដូចជាម៉ឺនុយដែលមានការបង្ហាញរូប ក៏ដូចជាប្រតិបត្តិការអន្តរកម្ម និងងាយស្រួលប្រើផងដែរ។ ខ្ញុំយកសៀវភៅកត់ចំណាំមួយមកតាមខ្លួនជានិច្ច ដើម្បីអាចកត់ទុកគំនិតទាំងឡាយដែលខ្ញុំបានគិតឃើញ គ្រប់ទីកន្លែងដែលខ្ញុំស្ថិតនៅ។ នេះជារបៀបដែលមុខងារថ្មីៗបានចាប់ផ្ដើម។”
Yoshino បានពណ៌នាថាតាមរយៈការសាកល្បង និងកំហុស ក្រុមការងារមិនដែលបញ្ឈប់ការងារទេ។ មានពេលខ្លះដែលក្រាហ្វមិនបង្ហាញឡើង ឬនឹងបង្ហាញអ្វីដែលមិនបានរំពឹងទុក។ ហើយគាត់នៅចាំបានយ៉ាងច្បាស់ រហូតមកដល់ឥឡូវនេះ អារម្មណ៍ដែលគាត់មាននៅពេលដែលទីបំផុតក្រាហ្វសម្រាប់ y=x2 បានបង្ហាញនៅលើអេក្រង់របស់ម៉ាស៊ីនគិតលេខគំរូ។ ចុងក្រោយ គំនិតដែលគាត់បានស្នើក្នុងសំណើរបស់គាត់បានក្លាយជាការពិត។
នៅទីបំផុត៖ ម៉ាស៊ីនគិតលេខបែបគូរក្រាហ្វដំបូងគេបង្អស់របស់ពិភពលោក
ដំណើរការនេះសម្រេចបានម៉ាស៊ីនគិតលេខ fx-7000G ជាស្ថាពរនៅឆ្នាំ 1985។
“នៅទីបញ្ចប់ យើងទទួលបានជោគជ័យក្នុងការបង្កើតផលិតផលមួយដែលបំពេញបានទាំងមុខងារ និងបច្ចេកវិទ្យាដែលយើងចង់បានតាមការគ្រោងទុក។”
គំនិតរបស់ Yoshino បានរីកដុះដាលមិនត្រឹមតែចំពោះការអភិវឌ្ឍផលិតផលប៉ុណ្ណោះទេ ប៉ុន្តែថែមទាំងចំពោះកេរ្តិ៍ឈ្មោះផលិតផលទៀតផង។
“ខ្ញុំចាប់ផ្ដើមពី ‘fx’ ដែលជាឈ្មោះម៉ាកសម្រាប់ម៉ាស៊ីនគិតលេខបែបវិទ្យាសាស្ត្ររបស់ Casio។ បន្ទាប់មក ខ្ញុំបានគិតអំពីលេខ 7 ធ្វើជាលេខសំណាង ដូច្នេះយើងបានដាក់ឈ្មោះម៉ូដែលនេះថា ‘fx-7000G’។”
នារដូវក្ដៅនោះ ម៉ាស៊ីនគិតលេខ fx-7000G បានទាក់ទាញចំណាប់អារម្មណ៍យ៉ាងខ្លាំងនៅឯពិព័រណ៍គ្រឿងអេឡិចត្រូនិក (CES) នៅសហរដ្ឋអាមេរិក។
“គ្រូបង្រៀនបានមកស្តង់ និងបានប្រើវា រួចហើយនិយាយថា ‘ពិតជាអស្ចារ្យណាស់!’ ខ្ញុំសប្បាយចិត្តណាស់ដែលបានឮការសរសើរបែបនេះ។”
ចាប់ពីពេលនោះមក ព័ត៌មានអំពីបដិវត្តន៍ម៉ាស៊ីនគិតលេខ fx-7000G បានរីករាលដាលនៅក្នុងវិស័យជាច្រើន ដោយលោក Yoshino ត្រូវបានណែនាំនៅក្នុងសន្និសីទអប់រំដោយបុគ្គលលេចធ្លោនៅក្នុងវិស័យអប់រំថាជា “វិស្វករដែលបង្កើតម៉ាស៊ីនគិតលេខបែបគូរក្រាហ្វដំបូងគេបង្អស់។”
មុខងារស្នូលនៃម៉ាស៊ីនគិតលេខនៅក្នុងថ្នាក់រៀន
លោក Yoshino បានបញ្ជាក់ថាម៉ាស៊ិនគិតលេខ fx-7000G មិនមែនមានតែសមត្ថភាពគូរក្រាហ្វប៉ុណ្ណោះទេ។
“ខ្ញុំជឿថា តាមរយៈការបង្ហាញក្រាហ្វរួមជាមួយនឹងលទ្ធផលគណនា ម៉ាស៊ីនគិតលេខនេះបានចូលរួមជំរុញឱ្យមានការអភិវឌ្ឍរបៀបសិក្សាថ្មីៗ ដែលលើកទឹកចិត្តដល់ការរុករកអ្វីដែលថ្មី និងការអភិវឌ្ឍជំនាញគិតបែបតក្ក។”
ការចេញផ្សាយម៉ាស៊ីនគិតលេខ fx-7000G បានអនុញ្ញាតឱ្យមានការប្រើប្រាស់ម៉ាស៊ីនគិតលេខជាឧបករណ៍អប់រំនៅក្នុងប្រទេសជាច្រើន រួមទាំងសហរដ្ឋអាមេរិក បារាំង អាល្លឺម៉ង់ និងអូស្ត្រាលី។ ការប្រើប្រាស់ម៉ាស៊ីនគិតលេខ និងការទទួលយកបច្ចេកវិទ្យាទៅក្នុងវិស័យអប់រំ បានកើនឡើងយ៉ាងឆាប់រហ័ស។
ជាការទទួលស្គាល់ការរួមចំណែករបស់ម៉ាស៊ីនគិតលេខ fx-7000G ចំពោះការអប់រំផ្នែកគណិតវិទ្យា ម៉ាស៊ីនគិតលេខនេះត្រូវបានរួមបញ្ចូលនៅក្នុងបណ្ដុំស្ថាប័ន Smithsonian នៅសហរដ្ឋអាមេរិក។ យើងអាចនិយាយបានថា ម៉ាស៊ីនគិតលេខ fx-7000G ដើរតួនាទីដ៏សំខាន់នៅក្នុងប្រវត្តិសាស្រ្តម៉ាស៊ីនគិតលេខបែបវិទ្យាសាស្ត្រ។
ក្រោយមក Casio បានបន្តធ្វើការជាមួយអ្នកអប់រំ ដើម្បីណែនាំមុខងារបន្ថែមទៀត ដែលងាយស្រួលប្រើក្នុងថ្នាក់រៀនរបស់ពួកគេ។ ដំណើរការនេះបានបង្កើតលទ្ធផលដូចជា ស៊េរីម៉ាស៊ីនគិតលេខ MS ដែលអនុញ្ញាតឱ្យអ្នកប្រើប្រាស់បញ្ចូលព័ត៌មានក្នុងទម្រង់សៀវភៅសិក្សា ក៏ដូចជាស៊េរី ES ដែលមានសមត្ថភាពបង្ហាញរូបមន្តជាតម្លៃលេខដូចគ្នាទៅនឹងអ្វីដែលបង្ហាញក្នុងសៀវភៅសិក្សា។ នៅក្នុងវិធីទាំងនេះ និងវិធីជាច្រើនទៀត ម៉ាស៊ីនគិតលេខបែបវិទ្យាសាស្ត្ររបស់ Casio នៅតែបន្តវិវត្តទៅមុខជានិច្ច។
fx-82MS
fx-991ES
ម៉ាស៊ីនគិតលេខបែបវិទ្យាសាស្ត្រជាឧបករណ៍ជំនួយការអប់រំក្នុងការជំរុញការរុករកថ្មីៗ
គោលគំនិតដែលគួរតែមាននៅក្នុងម៉ាស៊ីនគិតលេខបែបវិទ្យាសាស្ត្រ មានទំនាក់ទំនងយ៉ាងរឹងមាំជាមួយបទពិសោធផ្ទាល់របស់ Yoshino ក្នុងអំឡុងពេលដែលគាត់ជាសិស្ស។
“នៅពេលខ្ញុំជានិស្សិតសាកលវិទ្យាល័យ ខ្ញុំបានធ្វើការគណនាជាច្រើនដោយដៃពាក់ព័ន្ធនឹងចំនួនកុំផ្លិច និងអាំងតេក្រាល ដើម្បីវិភាគសៀគ្វី ហើយខ្ញុំឆ្ងល់ថាតើម៉ាស៊ីនគិតលេខអាចជួយកាត់បន្ថយពេលវេលាដែលខ្ញុំត្រូវគណនាដោយដៃបានប៉ុន្មាន។ ខ្ញុំក៏ធ្លាប់ឮគ្រូបង្រៀនជាច្រើននិយាយថា គណិតវិទ្យាមាន ‘ឧបសគ្គ’ ចំនួនបីដែលធ្វើឱ្យយើងមិនចូលចិត្តមុខវិជ្ជានេះ។ ឧបសគ្គទាំងនេះគឺប្រភាគ សមីការ និងការគណនា។ ដូច្នេះ ខ្ញុំតែងតែគិតអំពីរបៀបបង្កើតឧបករណ៍មួយចំនួនដែលអាចដោះស្រាយបញ្ហាទាំងនេះ និងជួយដល់ការសិក្សាគណិតវិទ្យារបស់សិស្សានុសិស្សផងដែរ។”
ម៉ាស៊ីនគិតលេខបែបវិទ្យាសាស្ត្រត្រូវតែមានសមត្ថភាពអាចផ្ដល់ចម្លើយបានច្រើនជាងម៉ាស៊ីនដែលគ្រាន់តែផ្ដល់ចម្លើយ។ ម៉ាស៊ីនគិតលេខបែបវិទ្យាសាស្ត្រទាំងនេះ ត្រូវតែជាឧបករណ៍ជំនួយការអប់រំដែលគាំទ្រដល់ការសិក្សាស្វែងយល់ដែលពាក់ព័ន្ធនឹងការធ្វើតេស្តផ្ទាល់ខ្លួន ការគិត និងការរកឃើញ។
នេះហើយជាគំនិតដែលស្ថិតនៅពីក្រោយការបង្កើតម៉ាស៊ីនគិតលេខ fx-7000G នេះឡើង ថែមទាំងជាមូលដ្ឋានគំនិតសម្រាប់ម៉ាស៊ីនគិតលេខបែបវិទ្យាសាស្ត្រទាំងមូលផងដែរ។
សម្លឹងមើលទៅអនាគត៖ គោលគំនិតរបស់ Casio សម្រាប់អាជីវកម្មក្នុងវិស័យអប់រំ
នៅក្រុមហ៊ុន Casio ពីគោលជំនឿសាជីវកម្មរបស់យើងអំពី “ភាពច្នៃប្រឌិត និងការចូលរួមចំណែក” យើងបានទាញយកបេសកកម្មនៃការបង្កើតគំនិតច្នៃប្រឌិត និងគុណតម្លៃថ្មីៗ រួចផ្តល់ការចូលរួមចំណែកទាំងនេះដល់សង្គម។
សម្រាប់អាជីវកម្មក្នុងវិស័យអប់រំ Casio បានកំណត់សេចក្ដីថ្លែងការណ៍ថា “ជំរុញការចង់ដឹងចង់ឃើញរបស់អ្នក” ដើម្បីតំណាងឱ្យគោលដៅរបស់យើងក្នុងការជំរុញដល់ការរីកចម្រើន និងការអភិវឌ្ឍ “ខ្សែសង្វាក់សម្រាប់ការចង់ដឹងចង់ឃើញ” ចំពោះបញ្ញាវន្តម្នាក់ៗ ដែលការទទួលបានចំណេះដឹងថ្មីៗនាំឱ្យមានការចង់ដឹងចង់ឃើញបន្ថែមទៀត។ យើងកំពុងចូលរួមក្នុងគំនិតផ្ដួចផ្ដើមផ្សេងៗ ដើម្បីសម្រេចគោលដៅនេះ។
ឧត្ដមគតិ និងវិធីសាស្ត្រទាំងនេះមិនមែនកើតឡើងក្នុងពេលតែមួយយប់ទេ។ ផ្ទុយទៅវិញ វាជាការរីកចម្រើនឥតឈប់ឈរនៃអ្វីដែលបានចាប់ផ្ដើមស្របនឹងបំណងប្រាថ្នារបស់លោក Yoshino ក្នុងការបង្កើតម៉ាស៊ីនគិតលេខដែលអាចគូរក្រាហ្វបាន ដែលពិភពលោកមិនធ្លាប់បានឃើញ ក៏ដូចជាកិច្ចខិតខំប្រឹងប្រែងរបស់ក្រុមការងារអភិវឌ្ឍន៍តាំងពីពេលនោះមក។
